Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
Artıq susmaq olmur. Son vaxtlar bəzi insanların şəhid ailələrinə, şəhid atalarına, şəhid həyat yoldaşlarına və qazilərimizə qarşı sərgilədiyi hörmətsizlik, yazdığı təhqirlər və etdiyi ittihamlar insanı dərindən sarsıdır. Bir şeyi unutmayın-bu gün rahat yaşadığımız torpaq uğrunda canından keçənlər şəhidlərimizdir. Bu gün bayrağımız dalğalanırsa, bunun arxasında övladını torpağa verən analar, oğul dərdi çəkən atalar, yarımçıq qalan ailələr dayanır.
Etikxeber.az xəbər verir ki, bunu Şəhid Miqdad Abduləlimovun anası, “Vətən Naminə” Şəhid Ailələrinə Dəstək İctimai Birliyinin rəhbəri Tünzalə Abduləlimova dilə gətirib.
Onunun sözlərinə görə, amma təəssüf ki, bəzi insanlar sosial şəbəkələrdə, TikTok səhifələrində, müxtəlif platformalarda özlərinə baxış, izlənmə və gündəm qazanmaq üçün şəhid adını belə alçaltmaqdan çəkinmirlər.
“Tam araşdırılmamış hadisələr üzərindən şəhid ailələrini hədəfə çevirmək, onların ünvanına ağır sözlər yazmaq, onları linç etmək hansı vicdana sığır?
Bir şəhid ailəsi artıq ən ağır cəzanı həyatın özündən alıb-övlad itkisini yaşayıb. Siz daha nə vermək istəyirsiniz onlara? Daha nə qədər ağrı yükləmək istəyirsiniz?
Heç kimin şəhid adını ucuz müzakirə mövzusuna çevirməyə haqqı yoxdur. Heç kimin şəhid atasını, şəhid həyat yoldaşını, şəhid ailəsini təhqir etməyə haqqı yoxdur.
Fikir bildirmək ayrı şeydir, insanların şərəf və ləyaqətini tapdalamaq ayrı. Bu ölkənin şəhidlərinə borclu olan insanlar əvvəlcə hörməti öyrənməlidir.
Şəhidlərimizin ruhunu incidəcək, ailələrinin qəlbini qıracaq sözlər yazmazdan əvvəl hər kəs vicdanı ilə baş-başa qalmalıdır. Allah bütün şəhidlərimizə rəhmət eləsin! Onların ailələrinə qarşı hörmət isə seçim deyil-borcdur!”-deyə, o, əlavə edib.
Etikxeber.az
