“Şəhidlərimizin adlarının əbədiləşdirilməsinin yolu açılsın, Kürdəmirdə xatirə-memorial kompleksi ucaldılsın”-DAHA BİR ŞƏHİD VƏ QAZİ ANASI-SİMUZƏR BAĞIYEVA BAŞ NAZİRƏ MÜRACİƏT ETDİ

Simuzər BAĞIYEVA: “Çox istərdik ki, 1994-cü ildə verilmiş çox yanlış və ziyanlı bir qərar aradan qaldırılsın və Şəhidlərimizin, övladlarımızın adının əbədiləşdirilməsinin yolu, önü açılsın. Bu, həm Allaha, həm də bəndəyə xoş gedər”

Daha bir Şəhid anası (həm də Qazi və Əsgər anası)-Simuzər Bağıyeva Baş nazir Əli Əsədova müraciət ünvanlayıb.

Müraciətdə Şəhid adlarının əbədiləşdirilməsinin yolunun açılması, 1994-cü ildə qəbul olunmuş qərarın dəyişdirilməsi istənilir.

Etikxeber.az-a daxil olan müraciətdə qeyd olunur:

“Hörmətli, Əli müəllim!

Sizə bir qrup Şəhid anası adından müraciət edirəm. Bu, tək mənim yox, onlarla Şəhid anasının müraciətidir. Əvvəl onu qeyd edim ki, biz Şəhid anaları öz övladlarımızla fəxr edir, qürur duyuruq.

Bizim övladlarımız Vətən, Torpaq, Qarabağ uğrunda cavan-gənc yaşlarında canlarını fəda edib, Şəhidlik ali məqamına ucalıblar. 44 günlük müharibə ilə 32 illik münaqişəyə son qoyublar, Xalqımıza, Dövlətimizə, Vətənimizə tarixi Qələbə, Zəfər yaşadıblar. Təbii ki, Müzəffər, Qalib Sərkərdə, Xalqının Xiaskar oğlu ölkə Prezidenti cənab İlham Əliyevin rəhbərliyi altında. Tarixi Qələbə və Zəfərimizin banisi, memarı heç şübhəsiz ki, Ali Baş Komandanımızdır.

Eyni zamanda, Zəfər və Qələbə dastanını yazan İgid, Qəhrəman, Şəhid oğullarımızdır. Şəhidlər ölmürlər, ölməyiblər, onlar öz ölümləri ilə Ölümsüzlüyə qovuşublar, mənən, ruhən bizimlədirlər, bizimlə də birgə olacaqlar. Hörmətli, Əli müəllim! Müraciət etməkdə məqsədimiz odur ki, biz Şəhid anaları, Şəhid valideynləri övladlarımızın, Şəhidlərimizin adlarının yaşadılmasını, əbədiləşdirilməsini istəyirik. İstəyirik ki, Nazirlər Kabinetinin keçmiş rəhbərliyi tərəfindən 1994-cü ildə qəbul edilmiş yanlış qərar aradan qaldırılsın, ləğv edilsin. Çünki həmin qərara əsasən, yalınız ən azı iki ordeni olan Şəhidin adı əbədiləşdirilə, hansısa küçəyə, məktəbə, uşaq bağçasına və digər müəssisəyə, obyektə verilə bilər.

Bu isə böyük əksəriyyət təşkil edən Şəhidlərimizin (demək olar ki, 80-90 faizin) adlarının əbədiləşdirilməsini, harayasa verilməsini mümkünsüzləşdirir və biz Şəhid analarını, Şəhid ailələrini dərindən incidir, yaralayır. Ona görə çox istərdik ki, 1994-cü ildə verilmiş çox yanlış və ziyanlı bir qərar aradan qaldırılsın və Şəhidlərimizin, övladlarımızın adının əbədiləşdirilməsinin yolu, önü açılsın. Bu, həm Allaha, həm də bəndəyə xoş gedər. Bu, həm Şəhid ruhlarını sevindirmiş olar, həm də acılı, kədərli Şəhid ailələrinin dərdlərinin üstünə azacıq olsa belə, su səpmiş, bizlər üçün bir təsəlli olar.

Ona görə inanırıq və ümid edirik ki, 1994-cü ildə verilmiş məlum yanlış qərarın aradan qaldırılmasına dəstəyinizi, köməyinizi əsirgəməyəcəksiniz və biz Şəhid ailələrini, gözüyaşlı, həm də Məğrur, Qürurlu Şəhid analarını sevindirəcəksiniz. Öncədən də Sizə dərin minnətdarlığımızı ifadə edirik”.

Müraciətdə daha sonra qeyd olunur:

“Hörmətli,Əli müəllim!

Həm də 3 övlad, 3 İgid-Şəhid, Qazi və Əsgər anası kimi, bir şəxsi arzumu Sizə çatdırmaq istərdim. Bu arzum da ondan ibarətdir ki, rayonumuzda, Kürdəmirdə Şəhidlərimizin adına, xatirəsinə xatirə-memorial kompleksinin ucaldılmasına köməyinizi, dəstəyinizi əsgirgəməyəsiniz.

Qarşıdan, bir neçə aydan sonra, 2021-ci ilin 8 noyabrında Zəfər Günü gəlir. Çox arzu edərdim ki, həmin Gün və gələcəkdə hər il Zəfər Günündə Vətən Müharibəsi iştirakçıları, Şəhid ailələri, Qazilər, rayon sakinləri məhz həmin xatirə-memorial kompleksinin önünə yığışsınlar, toplaşsınlar, Şəhidlərimizi ansınlar, qısa da olsa, Zəfər Paradı keçirsinlər.

Bu, elə bilirəm ki, hər bir Şəhid ailəsinin, bütövlükdə hər bir insanımızın ürəyindən olardı. Ən əsası Şəhidlərimizin bir daha nakam ruhları sevindirilərdi. İnanıram və ümid edirəm ki, bu məsələdə də dəstəkçimiz, yardımçımız olacaqsınız.

Allah Dövlətimizi, Xalqımızı, Vətənimizi, Şanlı Ordumuzu və Qalib Ali Baş Komamdanımızı qorusun!”

Qeyd edək ki, Simuzər Bağıyeva Kürdəmirin İkinci Vətən Müharibəsi Şəhidlərindən olan Cəmil Məmmədlinin anasıdır.

Etikxeber.az

Read Previous

Gürcüstanın Baş naziri Azərbaycana səfər edəcək-SABAH

Read Next

“Nə hikmətdirsə, Azərbaycanın Cənubi Qafqazda, Asiyada önəmli strateji keçid nöqtəsi olduğunu tez-tez gündəmə gətirirlər….Sanki Azərbaycan azərbaycanlıların deyil, beynəlxalq aləmin diqqətini üzərinə toplamış nəzər nöqtəsi kimi danışırlar…”-NUMAN KURTULMUŞ

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir