Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
“ Ta qədimdən bu günədək Azərbaycanda türklər yaşayıb”
“Bu, sadəcə, açıqlama deyil, bu, bütöv bir milləti təhqir etməkdir. Şəxsən mən bu açıqlamadan sonra özümü təhqir olunmuş hesab edirəm. Mənim milli kimliyimi – atamın, babamın, nəslimin, kökümün, əslimin mənsubiyyətini nə Arif Rəhimzadə, nə də onun kimi Azərbaycanın dövlət müstəqiliyinin əlehinə çıxmış heç bir insan təyin edə bilməz”.
Etikxeber.az xəbər verir ki, bu haqda Gununsesi.info-ya Milli Məclisin (MM) Regional məsələlər komitəsinin sədri Arif Rəhimzadənin Rusiya mətbuatında azərbaycanlıların türk olmaması ilə bağlı səsləndirdiyi fikrinə münasibət bildirərkən sabiq millət vəkili Gültəkin Hacıbəyli deyib.
G. Hacıbəyli qeyd edib ki, “Azərbaycan xalqı” geniş anlayışdır:
“Azərbaycan xalqı” dedikdə biz Azərbaycanda yaşayan bütün etnik qurupların təmsilçilərini bura aid edirik. Hamımız azərbaycanlıyıq. Azərbaycanda yaşayan türklər də, talışlar da, ləzgilər də, tatlar da, kürtlər də, avarlar da daxil olmaqla, ümumilikdə Azərbaycan xalqıyıq. Amma millət olaraq, millətimizin adı Türkdür. Əgər kiminsə öz etnik kökü ilə bağlı şübhələri, narahatlığı varsa, bunu bütün xalqa aid etməsin.
Ta qədimdən bu günədək Azərbaycanda türklər yaşayıb. Tarixi qaynaqlar birmənalı olaraq bunu sübuta yetirib. Danşdığımız dil türk dili, tariximiz və mədəniyyətimiz türk mədəniyyətidir. Ümumiyyətlə, bu milli məsələ o qədər həssas və müqəddəs bir mövzudur ki, bu mövzuya müdaxilə edib insanların hissləri ilə oynamaq düzgün deyil…
Heç kim mənim ata-babadan gələn milli mənsubiyyətimə kölgə sala bilməz. Bunu geniş anlamda millətim haqqında deyirəm. Təəssüflər olsun ki, bu gün millət vəkili adını daşıyan bəzi insanlar bu dərəcədə rüsvayçı səhvlərə yol verirlər. İnsanların hissləri ilə oynayırlar.
Mən bunu, sadəcə, Azərbaycanda yaşayan milyonlarla türkə qarşı təhqir hesab edirəm”-, deyə o bildirib.
Xatırladaq ki, A. Rəhimzadə “KM.ru” rus xəbər portalına qalmaqallı müsahibə verib. Bildirib ki, azərbaycanlılara “türk” deyilməsi düzgün deyil, çünki azərbaycanlılar türk sayılmır.
Etikxeber.az
