Tərtər yenidən atəş altında-AzTV-NİN MAŞINI, DÜYƏRLİ KƏND MƏKTƏBİ ATƏŞƏ TUTULDU, DAĞINTILAR, YARALANANLAR VAR – İKİ İCRA NÜMAYƏNDƏSİ DƏ YARALANIB – YENİLƏNİB – (1)

Ermənistan silahlı qüvvələri tərəfindən Tərtər rayonu atəşə tutulur.

Etikxeber.az-ın AzTV-yə istinadən xəbərinə görə, Dövlət Televiziyasının maşını da atəşə məruz qalıb.

Nəticədə sürücü yaralanıb, AzTV-nin avtomobili yararsız vəziyyətə düşüb. 

Bununla yanaşı, erməni faşistləri tərəfindən rayonun Düyərli kənd orta məktəbi raket-top atəşinə məruz qalıb.

Məktəb binasına ciddi ziyan dəyib, ciddi dağıntılar var.

Həmçinin, yaralananlar var və onların 4 nəfər olduğu bildirilir.

10:21

***

Yaralananları sayı 6-ya çatıb.

Belə ki, yaralıları çıxarmağa cəhd edər Tərtər rayon İcra Hakimiyyəti başçısının Düyərli kənd ərazi icra nümayəndəsi Zeynalov Ramiz Surxay oğlu və Tərtər rayon İcra Hakimiyyəti başçısının Ələsgərli kənd ərazi icra nümayəndəsi Əhmədov Kamran Vəliyəddin oğlu ağır xəsarətlər alıb.

Yaralılar xəstəxanaya yerləşdirilib.

11:05

***

“Ermənistanın silahlı qüvvələri 10 oktyabr 2020-ci il tarixdə saat 12:00-dan etibarən elan edilmiş humanitar atəşkəs rejiminin tələblərini, o cümlədən 1949-cu il tarixli Cenevrə Konvensiyalarının əsas norma və prinsiplərini kobud şəkildə pozmaqla dinc mülki əhalimizə qarşı terror əməllərini davam etdirir”.

Baş Prokurorluqdan verilən məlumata görə, 14.10.2020-ci il tarixdə səhər saatlarından başlayaraq düşmən tərəfin silahlı birləşmələri tərəfindən Tərtər rayonu müxtəlif istiqamətlərdən intensiv raket və  ağır artilleriyadan atəşə tutulub.

14.10.2020-ci il tarixdə saat 10 radələrində Tərtər rayonu ərazisində kənd  orta məktəbinin həyətinə mərmi düşməsi nəticəsində Tərtər rayon İcra Hakimiyyəti başçısının Düyərli kənd inzibati ərazi dairəsi üzrə nümayəndəsi 1971-ci il təvəllüdlü Zeynalov Ramiz Surxay oğlu, Əsgərli kənd inzibati ərazi dairəsi üzrə nümayəndəsi, 1966-cı il təvəllüdlü Əhmədov Kamran Vəliyəddin oğlu, kənd sakinləri – 1976-cı il təvəllüdlü Əliyev Mətləb Cəmşid oğlu, 1987-ci il təvəllüdlü Əhmədov Xəyyam Məhəmməd oğlu, 1965-ci il təvəllüdlü İbrahimov İlqar İbrahim oğlu, 1996-cı il təvəllüdlü Ağazadə Firdovsi Alim oğlu və 1960-cı il təvəllüdlü Süleymanov Ağa Süleyman oğlu müxtəlif dərəcəli bədən xəsarətləri alaraq xəstəxanaya yerləşdiriliblər.

Bundan başqa, “Azərbaycan Televiziya və Radio Verilişləri” QSC-nın (Aztv) cəbhəboyu zonaya ezam olunmuş əməkdaşı 1983-cü il təvəllüdlü Qəmbərov Namiq Malik oğlu Ermənistanın mülki əhaliyə qarşı törətdiyi təxribatları dünya ictimaiyyətinə çatdırarkən televiziyanın xidməti avtomobilinin atəşə tutulması nəticəsində müxtəlif dərəcəli bədən xəsarətləri alaraq xəstəxanaya yerləşdirilib, avtomobilə isə ciddi ziyan dəyib.

Hazırda prokurorluq əməkdaşları tərəfindən mövcud  şəraitdə mümkün olan bütün istintaq tədbirləri həyata keçirilir.

Etikxeber.az