“Ziya, anan qurban, atan səndən təbrik zəngi gözləyir, ən azı yuxuda da olsa, təbrik etməyi unutma…”-ŞƏHİD ZİYADXAN ƏLİYEVİN ANASI YAZDI

Bu gün artıq 8 aydır məqamın ucalıqdır.

Bir necə il əvvəl bir status paylaşmışdın atan haqqında ki, əvvəl babam atamı çiyinlərində gəzdirib, sonra – atam böyüyəndən sonra atasına yaxşı övlad olub, babamı çiynində gəzdirib.

Və bildirirdin ki, zaman gələcək, mən atamı çiyinlərimdə gəzdirəcəm.

Bu gün bunu niyə xatırladım bilirsənmi, canım oğlum, çünki bu gün atanın doğum günüdür və sabah açılandan ağlayır,

Bilirsən, niyə?

Həmişə deyərdin ki, “ana, atam bilirsən niyə belə kövrəkdi, çünki 1iyun uşaqların müdafiəsi günü doğulub”.

Keçən il bu gün lap sabah ertədən zəng edib atanın doğum günün təbrik etmişdin.

Bəzən fikirləşirəm: Ziyadxan, baban atandan daha şanslı imiş, çünki o oğlanlarının çiynində son mənzilə getdi, atan isə...

Nə isə…

Ziya, anan qurban, atan səndən təbrik zəngi gözləyir, ən azı yuxuda da olsa, təbrik etməyi unutma.

Ziya, o qədər darıxıram ki… Bircə dəfə səni görmək üçün ömrümü pay verərəm…

Bu gün uşaqların müdafiəsi günüdür, mən səni qoruya bilmədim.

Çünki övladın neçə yaşı olur-olsun, valideyinlər üçün hər yaşda uşaqdır.

Məkanın cənnət olsun!

Analar yanar ağlar.

Günləri sayar ağlar.

Dönər,göy göyərçinə

Yollara qonar ağlar.

Əslən Cəbrayıllı, özü isə Kürdəmirli olan İkinci Vətən Müharibəsi Qəhrəmanı və Şəhidi-ZİYADXAN İBRAHİM OĞLU ƏLİYEV – FOTOLAR

Şəhid Ziyadxan Əliyevin anası Müşgünaz HƏZİ

Etikxeber.az