Sumqayıt teatrında “Oğru”

Hüseyn Ərəblinski adına Sumqayıt Dövlət Dram Teatrı premyeraya hazırlaşır. Truppa yaxın günlərdə Marsel Berkye Marinyenin “Oğru” əsərinin tamaşasını sənətsevərlərə təqdim edəcək.

Teatrın baş rejissoru, Əməkdar Artist Firudin Məhərrəmov Etikxeber.az-a bildirib ki, rejissor Rövşən Almuradlının quruluş verdiyi tamaşa komediya janrındadır. Səhnə əsərinin süjetində əsl məhəbbətin qiyməti ön plana çəkilir, gərgin yaşanan dramatik hadisələrin fonunda sevgi və pul dilemması müzakirəyə qoyulur.

Tamaşada Əməkdar Artist İzaməddin Bağırov, aktyorlar Şəmistan Süleymanlı, Elmir Mehdiyev, Füzuli Qərənizadə, Vəfa Qurbanova və İlahə Səfərova iştirak edirlər.

Etikxeber.az