Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
Bu, Xaçmazın İkinci Vətən Müharibəsi Şəhidlərindən və ailənin tək, yeganı övladı olan Davud Hacıyevin böyüyüb boya-başa çatdığı, yaşadığı evdir…
Əgər buna da ev demək mümkündürsə…
Ev adında daxma, kümə, hin…
Üzücü, utancverici…bir mənzərə, yenə də sözün aciz qaldığı durum…
3 yaşında (anası Validə xanımla birlikdə) “ata”sı tərəfindən tərk edilən, taleyin amansız axarına buraxılan Davud elə bu “ev”dən hərbi xidmətə, sonra isə hərbi səfərbərliyə və İkinci Vətən Müharibəsinə yollanıb…
Oktyabr ayının ikinci ongünlüyündə Şəhid və nəşini xeyli sonra, noyabrın 25-ində tapmaq mümkün olsa da, dəfnindən 7 ay keçsə də, Şəhidimizin tək-təhna yaşayan anasının ən azı bir otaqlı və normal şəraitli evlə, mənzillə təminatı məsələsi həll olunmayıb, məsələ müşkülə, müəmmaya dönüb az qala…
Çəkdiyi, üzləşdiyi sınaqlarla, əziyyətlərlə, üstəlik övlad acısı ilə için-için qovrulan Şəhid anası ev adına təhqir olan daxmada yaşamaqda, ömür çürütməkdədir…
Qeyd edək ki, bu “ev” Xaçmazın Şəhidimizin adını daşıyan küçəsində yerləşir…
Və onu da qeyd edək ki, digər bölgələrdən fərqli olaraq, Xaçmazda (və digər bir-iki rayonda) Şəhid adlarının əbədiləşdirilməsi, onların adlarına küçə verilməsi istiqamətində konkret addımlar atılmaqdadır və bunun özü təqdirəlayiqdir…
Tək-yeganə övladını itirən Şəhid anası ev, mənzil hayında olmadığını bildirsə də, bu məsələnin həll olunması arzusundadır…
Söz, qərar, addım isə Əmək və Əhalinin Sosial Müdafiəsi Nazirliyinindir…
Onlar qərar verməli və addım atmalıdır…
Eyni zamanda, YAŞAT, Xaçmaz rayon İcra Hakimiyyətinin də bu məsələdə üzərinə düşən məsuliyyət var…
Odur ki, hər üç qurum, xüsusilə, Əmək və Əhalin Sosial Müdafiəsi Nazirliyi bu məsələ ilə bağlı gecikmədən addımlar atmalı, bu üzücü mənzərəyə son qoymalı, həm Şəhidimizin ruhunu, həm də azacıq olsa, dərdli Şəhid anasının üzünü sevindirməlidir!
Konkret əməl, addım atmaq zamanıdır!
Kamil HƏMZƏOĞLU (HƏMİDOV)
Etikxeber.az
